Shkodër | 4 qershor 2025 – Drejtoria Vendore e Policisë Shkodër ka evidentuar dhe goditur disa shkelje të rendit dhe ligjit në territorin e saj, që nga dhuna në familje, drejtimi i automjeteve pa leje, deri te vjedhja e energjisë elektrike.
🔹 Thyen masën e sigurisë dhe kanos ish-vjehrrin
Specialistët për Hetimin e Krimeve në Komisariatin e Policisë Vau i Dejës kanë ndaluar shtetasin A. P., 33 vjeç, i cili kishte thyer masën e sigurisë “Arrest në shtëpi”. Ai dyshohet se ka kanosur ish-vjehrrin F. G., 58 vjeç, dhe djalin e tij A. G., 24 vjeç. Po ashtu, ndaj F. G. nisi procedim në gjendje të lirë, pasi dyshohet se ka ushtruar dhunë ndaj A. P.
🔹 Të rinj kapen në timon pa leje drejtimi
Specialistët e Qarkullimit Rrugor kanë referuar në Prokurori procedimin në gjendje të lirë për:
- S. P., 26 vjeç, dhe një 17-vjeçar, të kapur duke drejtuar automjete pa leje drejtimi;
- D. B., 22 vjeç, i cili u kap duke drejtuar një motomjet pa leje drejtimi.
🔹 Aksident dhe largim nga vendngjarja
Më 2 qershor, në spitalin e Shkodrës është paraqitur shtetasja V. S., 33 vjeçe, nga fshati Grudë e Re, e cila ka deklaruar se është përplasur nga një motomjet në aksin “Shkodër–Hani i Hotit” dhe drejtuesi është larguar. Policia po punon për identifikimin dhe kapjen e tij.
🔹 Vjedhje të energjisë elektrike
Janë proceduar penalisht:
- L. Sh., 66 vjeç, banues në Shkodër, pasi u konstatua me lidhje të paligjshme të energjisë në banesën e tij;
- F. F., 56 vjeç, nga fshati Rrjoll, pasi në lokalin e tij në Velipojë u gjet një lidhje e jashtëligjshme me rrjetin elektrik.
Të gjitha materialet procedurale janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Shkodër, për vijimin e hetimeve dhe veprimeve të mëtejshme ligjore.
