Inspektorati Kombëtar i Mbrojtjes së Territorit (IKMT) ka përfunduar fazën e dytë të ndërhyrjes në zonën e mbrojtur të Thethit, gjatë së cilës u prishën 14 objekte të ndërtuara pa leje brenda një dite.
Operacioni u zhvillua në bashkëpunim me Policinë e Shtetit dhe autoritetet vendore, si pjesë e aksionit të nisur për mbrojtjen e parkut kombëtar dhe zbatimin e ligjit në lidhje me ndërtimet e paligjshme në zona të mbrojtura.
Sipas njoftimit të IKMT-së, objektet e shembura përfshijnë struktura turistike dhe ndihmëse, të ndërtuara në kundërshtim me ligjin dhe pa leje ndërtimi, duke cenuar peizazhin natyror dhe trashëgiminë mjedisore të zonës.
“Veprimet tona janë të vendosura dhe të koordinuara për të ndalur betonizimin e zonave të mbrojtura dhe për të garantuar që zhvillimi të jetë në përputhje me ligjin dhe planifikimin urban”, deklaroi një përfaqësues i IKMT-së.
Faza e parë e ndërhyrjes në Theth u zhvillua disa javë më parë, ku gjithashtu u prishën disa ndërtime pa leje. Ndërhyrjet pritet të vijojnë në ditët në vijim, me kontrolle të tjera të parashikuara në zona të ndryshme të parkut.
Autoritetet kanë bërë thirrje për respektim të ligjit dhe janë shprehur se do të vijojnë me aksione të ngjashme në të gjithë territorin e vendit, në kuadër të luftës kundër ndërtimeve të paligjshme.
