Arrest me burg për dy të dyshuarit në vrasjen e Pavlin Prekës — Gjykata e Shkodrës pranon kërkesën e Prokurorisë
Gjykata e Shkallës së Parë në Shkodër ka caktuar masën e sigurisë “arrest me burg” për Vasel Koçekun, 43 vjeç, dhe Klaudio Lisajn, 20 vjeç, të dyshuar si autorë të vrasjes së Pavlin Prekës, 20 vjeç, ngjarje e ndodhur më 20 shkurt në zonën e Gucisë së Re, njësia administrative Rrethina.
Vendimi u mor pas kërkesës së Prokurorisë së Shkodrës, ndërsa prokurori Albert Murçaj theksoi në seancë se ekzistojnë prova hetimore, përfshirë përgjime ambientale, që sipas tij mbështesin dyshimet ndaj të arrestuarve.
Nga ana tjetër, avokatët Arbër Raja dhe Blerim Bazhdari kërkuan që të mos caktohej masë sigurie, me argumentin se mungojnë prova konkrete që i lidhin drejtpërdrejt me ngjarjen.
Të dy të dyshuarit kanë mohuar autorsinë, si gjatë marrjes në pyetje nga policia, ashtu edhe para gjykatës.
Dyshimet e hetimit
Koçeku dhe Lisaj akuzohen për veprat penale “Vrasja me paramendim e kryer në bashkëpunim” dhe “Mbajtja pa leje e armëve dhe municionit”. Ata u ndaluan në kuadër të operacionit policor të koduar “Pesha e Krimit”.
Sipas burimeve hetimore, ngjarja dyshohet se lidhet me një konflikt të nisur disa vite më parë, pasi viktima kishte kërkuar fejesën me vajzën e Vasel Koçekut, e cila në atë kohë ishte e mitur. Kjo kërkesë ishte refuzuar nga familja Koçeku.
Në vijimësi, sipas hetimit, marrëdhëniet mes palëve janë tensionuar, ndërsa mëngjesin e 20 shkurtit dyshohet se viktima është thirrur nga banesa për t’u takuar dhe më pas është qëlluar me armë zjarri. I riu u gjet pa shenja jete disa orë më vonë nga familjarët, pasi nuk iu përgjigjej thirrjeve.
Çfarë thonë familjarët dhe mbrojtja
Familjarë të Pavlin Prekës kanë deklaruar publikisht se i ndjeri nuk kishte konflikte të hapura dhe se jetonte mes Shkodrës dhe Dukagjinit.
Ndërkohë, të dy të arrestuarit vijojnë të mohojnë çdo përfshirje në ngjarje.
Me vendim të gjyqtares Tefta Xhanari, gjykata ka lënë në fuqi masën e arrestit me burg për të dy.
Hetimet vijojnë
Prokuroria e Shkodrës vijon hetimet për të zbardhur të gjitha rrethanat dhe motivet e kësaj ngjarjeje që tronditi opinionin publik rreth 10 muaj më parë.
