Në ambientet e Drejtorisë Vendore të Policisë Shkodër u zhvillua sot një takim ceremonial me familjarët e Dëshmorëve të Policisë, me rastin e festave të fundvitit. Në aktivitet morën pjesë drejtues të lartë të DVP Shkodër, si dhe prefektja e qarkut Shkodër, znj. Holta Duda.
Takimi u organizua në kuadër të kujdesit të vazhdueshëm të Policisë së Shtetit ndaj familjeve të efektivëve që kanë humbur jetën në krye të detyrës. Sipas burimeve zyrtare, ky angazhim mbetet një ndër prioritetet e Drejtorit të Përgjithshëm të Policisë së Shtetit, i cili ka vendosur në qendër të vëmendjes mbështetjen njerëzore dhe institucionale për këto familje.
Gjatë fjalës së tij, Drejtuesi i DVP Shkodër, Gentian Berberi, theksoi se fëmijët dhe familjarët e Dëshmorëve të Policisë mbeten pjesë e pandarë e “familjes së madhe të Policisë së Shtetit”.
“Është krenari që disa prej fëmijëve të Dëshmorëve të Policisë vijojnë të shërbejnë sot në radhët e Policisë, me përkushtim dhe devotshmëri,” — u shpreh Berberi.
Ky takim simbolik u shoqërua me mesazhe mirënjohjeje dhe respekti për sakrificën e atyre që ranë në krye të detyrës, si dhe me premtimin se Policia e Shtetit do të vijojë të jetë pranë familjeve të tyre, jo vetëm në festa, por gjatë gjithë vitit.
