Gjon Shkëmbi, xhaxhai i Elvis Shkëmbit, kërkon të lirohet nga paraburgimi pas arrestimit të tij për vrasjen e gjyqtarit të Apelit, Astrit Kalaja.
Aktualisht, Gjon Shkëmbi ndodhet në arrest me burg dhe akuzohet për “vrasje të funksionarëve publikë” në bashkëpunim dhe për “vrasje në rrethana të tjera cilësuese ndaj dy ose më shumë personave”, e mbetur në tentativë, po ashtu në bashkëpunim.
Në kërkesën e depozituar pranë Gjykatës së Tiranës, ai pretendon se nuk ekzistojnë më kushtet ligjore për vijimin e paraburgimit, duke theksuar se nuk ka pasur rol apo përfshirje në ngjarjen ku mbeti i vrarë gjyqtari Kalaja. Sipas mbrojtjes, mungojnë prova konkrete që e lidhin drejtpërdrejt me krimin.
Seanca për shqyrtimin e kërkesës pritet të zhvillohet gjatë ditës së sotme, ndërsa gjykata do të vendosë nëse rrethanat e çështjes justifikojnë ndryshimin e masës së sigurisë.
Vrasja e gjyqtarit Kalaja ka tronditur opinionin publik dhe sistemin e drejtësisë, duke ngritur shqetësime mbi sigurinë e gjyqtarëve dhe prokurorëve. Hetimet për këtë ngjarje vazhdojnë, ndërsa autoritetet po hetojnë disa pista, përfshirë edhe lidhjet e mundshme me çështje të ndjeshme që viktima kishte trajtuar gjatë ushtrimit të detyrës.
