Në qytetin e Shkodrës, ku historia, kultura dhe besimi ndërthuren natyrshëm, shpesh ndodhin gjëra që vërtet të prekin. Një prej tyre është edhe momenti i veçantë që aktori i njohur Astrit Fani ndau sot me ndjekësit e tij, me rastin e Kurban Bajramit.

Në një postim në rrjetet sociale, ai shkruan:

“Kjo ndodh vetëm në Shkodër

Jemi në Panairin e librit ‘Libri të ban të lirë’, organizuar në ambientet e Kishës së Madhe.

Këtu, takoj, autorë, përkthyes, botues dhe dashamirës të librit që janë të besimit mysliman.

Në oborrin e kishës ne i urojmë njëri-tjetrit. Gëzuar Bajramin!

Kjo ndodh vetëm në Shkodër”

Një panair libri i mbajtur në ambientet e Kishës së Madhe kthehet në një vendtakimi kulturor dhe shpirtëror, ku përtej librave dhe mendimeve, ndodhin urime të sinqerta mes besimtarëve të feve të ndryshme. E në këtë rast, është një akt simbolik – besimtarë myslimanë që urojnë Bajramin në oborrin e një kishe katolike, të mirëpritur dhe të respektuar.

Shkodra, e njohur për harmoninë ndërfetare, vazhdon të dëshmojë se bashkëjetesa nuk është vetëm fjalë, por një realitet i prekshëm, që përsëritet natyrshëm në jetën e përditshme të qytetarëve.

Në kohë kur ndarjet fetare shpesh keqpërdoren për qëllime politike apo ideologjike, Shkodra jep një mësim fisnikërie dhe respekti, ku feja dhe kultura nuk përjashtojnë, por bashkëjetojnë.