Banorë dhe aktivistë te fshatrave Zall-Gjoçaj në Mat dhe Lufaj në Mirditë protestuan këtë të mërkurë para Gjykatës së Lezhës, në mbështetje të tre qytetarëve të këtyre zonave, të cilët janë paditur për “fyerje” dhe “shpifje” nga kompania që ka ndërtuar HEC-et në këtë territor.
Në shenjë simbolike, ata vendosën një shirit të zi mbi megafon, duke e konsideruar çështjen si tentativë për t’iu mbyllur zërin, ndërsa “Fjala e lirë nuk është krim!” ishte mesazhi i tyre që u shfaq me një banderolë.
Sipas të paditurve, kjo është një formë presioni e hapur ndaj banorëve, ndërsa theksojnë se është pikërisht kompania ajo që ka shkaktuar dëme të mëdha në zonë. Ata kërkojnë që drejtësia të jetë e barabartë dhe të hetohen kallëzimet që ata kanë bërë më herët për falsifikime dhe shpërdorim detyre.Banorët dhe aktivistët shprehen se ndërtimi i HEC-eve ka shkaktuar një masakër mjedisore, duke e bërë zonën pothuajse të pabanueshme.
Permes kësaj padie, e cila po shqyrtohet nga Gjykata e Lezhës, kompania “Seka Hydropower” sh.p.k. kërkon shpalljen fajtor dhe dënimin e shtetasve Jorgji Locaj, Dhimitër Koleci dhe Adem Xhokola për veprat penale “fyerja” dhe “shpifja”, me pretendimin se deklaratat e tyre publike të pavërteta kanë cenuar imazhin e kompanisë. Seanca gjyësore e kësaj të mërkure dështoi të pajtonte palët dhe për këtë çështja kaloi për gjykim me seancën e parë të planifikuar më 15 dhjetor 2025.
