Detaje të reja nga Fushë-Arrëzi: Erzen Uka dhe Julian Cumraku ndihmoheshin nga një person i tretë — lëvizje të dyshimta, vizita në lokale dhe prani e shpeshtë në zonën malore
Hetimet për Erzen (Hamza) Ukën dhe Julian (Adem) Cumrakun, të arrestuar pas operacionit 12-orësh të forcave RENEA në Fushë-Arrëz, po zbulojnë një dimension të ri të aktivitetit të dyshimtë të tyre. Burime të Report Tv bëjnë me dije se dy të rinjtë, të dyshuar për përgatitje të një sulmi terrorist, nuk vepronin vetëm. Ata dyshohet të jenë mbështetur nga një person i tretë, i cili lëvizte shpesh midis Tiranës, Fushë-Arrëzit dhe zonës së Oroshit.
Sipas të dhënave operative, personi i paidentifikuar—i përshkruar me flokë të gjata dhe automjet në përdorim—është parë disa herë në lokalet e qytetit së bashku me Ukën dhe Cumrakun. Gjatë qëndrimeve të tyre të shkurtra, të tre mbanin kokën ulur, duke kufizuar çdo kontakt me stafin apo personat përreth. I njëjti person nuk rezulton të ketë frekuentuar dyqanet e zonës, çka ka shtuar dyshimet për një rol të strukturuar në lëvizjet e tyre.
Herën e fundit që ai është vërejtur, mbrëmjen e 18 nëntorit, Uka dhe Cumraku kryen vetë blerjet në qendër të qytetit, ndërsa personi i tretë priti në këmbë, në një hapësirë me ndriçim të reduktuar. Flokët e gjatë kanë bërë që prezenca e tij të ngatërrohet fillimisht me një figurë femërore, çka shpjegon edhe raportimet për “dy gra” të pashoqëruara në zonën e kullës ku të rinjtë qëndronin të izoluar.
Burime lokale kanë konfirmuar se personi me flokë të gjata është parë shpesh në shoqërinë e Ukës dhe Cumrakut, madje edhe teksa punonin dru në zonat e thella të Oroshit.
Heshtje totale gjatë marrjes në pyetje
Në ambientet e Drejtorisë Vendore të Policisë Shkodër, ku po mbahen në pritje të masës së sigurisë, Uka dhe Cumraku nuk kanë dhënë asnjë deklaratë. Ata kanë refuzuar të flasin si me oficerët e antiterrorit, ashtu edhe me oficerët gjyqësorë. Të dy i kanë cilësuar hetuesit “shejtan” dhe kanë deklaruar se “mund të gjykohen vetëm nga Zoti”.
Xhamia e Kryezit, jashtë kontrollit të Myftinisë
Xhamia e fshatit Kryezi, e frekuentuar kryesisht të premteve nga dy të arrestuarit. Myftinia e Pukës ka konfirmuar se objekti nuk figuron në inventarët e saj dhe nuk është nën administrimin e Komunitetit Mysliman të Shqipërisë. Institucioni ka zgjedhur të mos reagojë publikisht, duke iu përmbajtur praktikës standarde për raste të tilla.
Arsenal lufte dhe flamuri i ISIS
Gjatë kontrollit në kullën ku dy të rinjtë u rrethuan për më shumë se 12 orë, policia gjeti një arsenal të plotë armësh dhe municionesh:
- 4 armë automatike
- 1 pistoletë
- 17 granata dore difensive
- Rreth 2 mijë fishekë
- Kapsolla detonatore elektrike
- Fitil zjarrpërcjellës
- 2 gëzhoja
Mes armëve, në mur, ishte vendosur edhe flamuri i organizatës terroriste ISIS.
Akuzat
Prokuroria e Shkodrës po heton Ukën dhe Cumrakun për disa vepra penale të rënda, përfshirë:
- Nxitje dhe propagandë për kryerjen e veprave terroriste
- Prodhim dhe mbajtje pa leje të armëve luftarake
- Mbajtje të armëve shpërthyese dhe municioneve
- Kundërshtim të punonjësve të policisë së rendit publik
Hetimet po vijojnë edhe për identifikimin dhe kapjen e personit të tretë, i cili dyshohet se ka ndihmuar të arrestuarit në aktivitetin e tyre.
